ಐಪಿಎಲ್ 2022 ಹರಾಜಿಗೂ ಮುನ್ನ ಶೂಟಿಂಗ್, ಟೆನಿಸ್ ಅಭ್ಯಾಸ ಮಾಡಿದ ಎಂಎಸ್ ಧೋನಿ: ವೀಡಿಯೋ

ಫೆಬ್ರವರಿ 12 ಮತ್ತು 13ರಂದು ಬೆಂಗಳೂರಿನಲ್ಲಿ 2022ರ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್)ಗೆ ಆಟಗಾರರ ಹರಾಜು ಪ್ರಕ್ರಿಯೆ ನಡೆಯಲಿದೆ. ಮಾಜಿ ಚಾಂಪಿಯನ್ಸ್ ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್ಕೆ) ಈ ಸೀಸನ್ ನಲ್ಲಿ ಉತ್ತಮ ಪ್ರದರ್ಶನ ನೀಡಲು ಮತ್ತು ಮೆಗಾ ಆಕ್ಷನ್ ನಲ್ಲಿ ತಂಡ ಬಲಿಷ್ಠಗೊಳಿಸಿಕೊಳ್ಳಲು ಸಜ್ಜಾಗಿದೆ. 

ಸಿಎಸ್ಕೆ ನಾಯಕ ಎಂಎಸ್ ಧೋನಿ ಹರಾಜು ಪ್ರಕ್ರಿಯೆಗೂ ಮುನ್ನ ಶೂಟಿಂಗ್ ಮತ್ತು ಟೆನಿಸ್ ಅಭ್ಯಾಸ ಮಾಡಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಓಡಾಡುತ್ತಿದೆ. ಕ್ರಿಕೆಟರ್ ಧೋನಿ ಆಟಗಾರರ ಹರಾಜಿಗೂ ಮುನ್ನ ಮನಸ್ಸು ನಿರಾಳತೆಗಾಗಿ ಶೂಟಿಂಗ್, ಟೆನಿಸ್ ಅಭ್ಯಾಸದ ಮೊರೆ ಹೋಗಿದ್ದಾರೆ.

ಸಿಎಸ್ಕೆ ಈಗಾಗಲೇ ಈ ಬಾರಿಯ ಆಟಗಾರರ ಹರಾಜಿಗೂ ಮುನ್ನ ತಮ್ಮ ತಂಡದಲ್ಲಿ ಉಳಿಸಿಕೊಳ್ಳುವ ಆಟಗಾರರ ಪಟ್ಟಿ ಪ್ರಕಟಿಸಿದೆ. ನಾಯಕ ಧೋನಿ, ಆಲ್ ರೌಂಡರ್ ರವೀಂದ್ರ ಜಡೇಜಾ, ಮೊಯೀನ್ ಅಲಿ ಮತ್ತು ಆರಂಭಿಕ ಬ್ಯಾಟ್ಸ್ ಮನ್ ಋತುರಾಜ್ ಗಾಯಕ್ವಾಡ್ ಅವರನ್ನು ಸಿಎಸ್ಕೆ ಉಳಿಸಿಕೊಂಡಿದೆ. ಸಿಎಸ್ಕೆ ತಂಡ ಐಪಿಎಲ್ ನಲ್ಲಿ ಒಟ್ಟು ನಾಲ್ಕು ಬಾರಿ ಟ್ರೋಫಿ ಜಯಿಸಿದೆ.

ಆಟಗಾರರ ಹರಾಜಿನ ವೇಳೆ ಎಂಥ ಆಟಗಾರರನ್ನು ಆರಿಸಬೇಕು, ಯಾವ ವಿಭಾಗಕ್ಕೆ ಹೆಚ್ಚು ಪ್ರಾಶಸ್ತ್ಯತೆ ನೀಡಬೇಕು ಎನ್ನುವ ಬಗ್ಗೆ ಧೋನಿ ತಮ್ಮ ತಂಡ ನಿರ್ವಹಣಾ ಸಮಿತಿಗೆ ಅಭಿಪ್ರಾಯ ತಿಳಿಸಿದ್ದಾರೆ. ಹರಾಜು ವಿಚಾರವಾಗಿ ಧೋನಿ ಕೆಲ ದಿನಗಳಿಗೆ ಮುಂಚೆಯೇ ಚೆನ್ನೈಗೆ ಬಂದಿಳಿದಿದ್ದಾರೆ ಎಂದು ಮೂಲದಿಂದ ತಿಳಿದು ಬಂದಿದೆ.